Далучыць да роднага слова: заняткі ў СШ №13 г. Брэста імя У.І. Хована

Ты забыць сваю мову не мусіш,

Каб агеньчык яе не ачах.

Пазнаюць нас, што мы з Беларусі,

Па гаворцы, па нашых вачах.

(«Твая мова» П. Прыходзька)

Духоўнай каштоўнасцю кожнага народа з’яўляецца родная мова. Наша мова — адна з найбольш мілагучных моў свету. Трапная і сакавітая, яна заўсёды была прадметам гонару беларускага народа.

Сёння, 21 лютага, у Міжнародны дзень роднай мовы, пазнавальна і весела прайшла размова з навучэнцамі 4 «А» класа СШ №13 імя У.І. Хована. Супрацоўнікі бібліятэкі пазнаёмілі дзяцей з кнігай Міколы Маляўкі «Спадчына, або Каб не стаць манкуртам…» Кніга знаёміць з жыццём нашых продкаў, з мовай, распавядае, чым займаліся, якімі рэчамі гаспадарчага і хатняга ўжытку карысталіся нашы бабулі і дзядулі, якую спадчыну пакінулі сваім нашчадкам. Абразкі з жыцця старой вёскі перасыпаны паэтычнымі радкамі, сур’ёзнымі і вясёлымі гісторыямі, народнымі прыкметамі і парадамі, прыказкамі і прымаўкамі, загадкамі.

Дзеці з захапленнем адказалі на пытанні, якія падрыхтаваў для іх аўтар, адгадалі загадкі, крыжаванкі, успомнілі вершы на роднай мове.